p.stras.2.83

βασιλευόντων βασιλίσσης καὶ βασιλέως Πτολεμαίου θεῶν Φιλομητόρων Σωτήρων ἔτους γ, ἐφʼ ἱερέως βασιλέως Πτολεμαίου θεοῦ Φιλομήτορος Σωτῆρος Ἀλεξάνδρου καὶ θεῶν Σωτήρων καὶ θεῶν Ἀδελφῶν καὶ θεῶν Εὐεργετῶν καὶ θεῶν Φιλοπατόρων καὶ θεῶν Ἐπιφανῶν καὶ θεοῦ Εὐπάτορος καὶ θεοῦ Φιλομήτορος καὶ θεοῦ Φιλοπάτορος Νέου καὶ θεοῦ Εὐεργέτου καὶ θεῶν Φιλομητόρων Σωτήρων, ἱεροῦ πώλου Ἴσιδος μεγάλης μητρὸς θεῶν, ἀθλοφόρου Βερενίκης Εὐεργέτιδος, κανηφόρου Ἀρσινόης Φιλαδέλφου, ἱερείας Ἀρσινόης Φιλοπάτορος τῶν ὄντων ἐν Ἀλεξανδρείαι, ἐν δὲ Πτολεμαίδι τῆς Θηβαίδος ἐφʼ ἱερέων καὶ ἱερισσῶν καὶ κανηφόρου τῶν ὄντων καὶ οὐσῶν ἐν Πτολεμαίδι τῆς Θηβαίδος, μηνὸς Φαμενὼθ ιθ. ἐν Παθύρει, ἐφʼ Ἡλιοδώρου ἀγορανόμου. ἑκόντες συνεγράψαντο. ὁμολογεῖ Πατῆς Τοτοέους Πέρσης τῆς ἐπιγονῆς καὶ Ταελιλοῦς καὶ Σιεπμοῦς τῶν Τοτοέους Περσίναι μετὰ κυρίου τοῦ προγεγραμμένου Πατῆτος ἀφίστασθαι ἀπὸ τῆς Τακμήιτος τῆς Πατοῦτος τῆς μητρὸς τούτων γῆς ἠπείρου σιτοφόρου σφραγίδων τριῶν ἐν τῶι περὶ Παθῦριν πεδίωι, ὧν ἔθετο αὐτοῖς ὠνὴν δόσεως τοῦ με ἔτους, ὧν εἰσὶν μιᾶς μὲν ἐν τῶι ἄνω πεδίωι, ἄλλης ἐν τῆι μέσῃ ταινίαι λεγομένῃ Τιεβῶθε, ἄλλης ἐν Τεμραύθει κάτω, ὧν αἱ γειτνίαι δεδήλωνται διὰ τῆς ὠνῆς, ἣν καὶ ἀναδέδωσκαν τὴν ὠνὴν Τακμήιτι ἑκόντες, καὶ μὴ ἐπελεύσασθαι Πατῆν μηδὲ Ταελιλοῦν μηδὲ Σιεπμοῦν τῶν Τοτοέους μηδʼ ἄλλον μηδένα ὑπὲρ αὐτῶν ἐπὶ τὴν Τακμῆιν μηδʼ ἐπʼ ἄλλον μηδένα τῶν παρʼ αὐτῆς περὶ τῆς σημαινομένης συνγραφῆς μηδὲ περὶ τῶν σφραγίδων τριῶν γῆς τρόπωι μηδενί, εἰ δὲ μὴ, ἡ τʼ ἔφοδος αὐτῶι τε καὶ τῶι ὑπὲρ αὐτῶν ἐπελθόντι ἄκυρος ἔστω καὶ προσαποτεισάτω ὁ ἐπιπορευόμενος ἐπιτίμου παραχρῆμα Τακμήιτι μὲν χαλκοῦ τάλαντα δέκα πέντε καὶ ἱερὰς βασιλεῦσι ἀργυρίου ἐπισήμου δραχμὰς τ καὶ μηθὲν δʼ ἧσσον ἐπάναγκον αὐτοῖς ἔστω ποιεῖν κατὰ τὰ προγεγραμμένα.