pap.agon.2

1 ἀντίγραφον?
2 Ὀξυρυγχιτῶν τῆς λαμπρᾶς καὶ λαμπροτάτης πόλεως
3 ἡ κρατίστη βουλὴ διὰ Αὐρηλίου Εὐπότου τοῦ καὶ Ἀγαθοῦ
4 Δαίμονος, γενομένου κοσμητοῦ, ἐξηγητοῦ,
5 ὑπομνηματογράφου τῆς λαμπροτάτης πόλεως τῶν Ἀλεξανδρέων, πρυτανεύσαντος
6 καὶ ὡς χρηματίζει, βουλευτοῦ, ἐνάρχου πρυτάνεως,
7 βιβλιοφύλαξι ἐνκτήσεων τοῖς φιλτάτοις χαίρειν ·
8 δίκαια ἡμῖν παρέθετο ἑαυτοῦ ἠρτημένα
9 καθολικῶν νόμων Αὐρήλιος
10 Ἀπολλοδίδυμος Πλουτίωνος περὶ τοῦ καταλελέχθαι
11 αὐτὸν εἰς τὸν σύλλογον τῆς ἱερᾶς συνόδου,
12 καὶ κατὰ τὰ εἰθισμένα προσκυνήσαντες
13 τὰ θεῖα ἔτι μᾶλλον ταῦτα αὐτῷ
14 ἐβεβαιώσαμεν. ἐπεὶ οὖν ἀκόλουθον ἔγνωμεν
15 εἶναι ταῦτα φανερῶς ἀνενέγκαι ὑμῖν, ἵνʼ
16 εἰδῆτε τὴν ὑπάρχουσαν αὐτῷ ἐκ τῶν
17 νόμων ἀτέλειαν καὶ τὴν δέουσαν
18 παράθεσιν ποιήσησθε τῷ ὀνόματι
19 αὐτοῦ, ἐπιστέλλεται ὑμῖν, φίλτατοι.
20 ἐρρῶσθαι ὑμᾶς εὔχομαι, φίλτατοι.
21 ἔτους ε τοῦ κυρίου ἡμῶν Αὐρηλιανοῦ
22 Σεβαστοῦ, Μεχεὶρ.