c.pap.gr.1.6

κόλλημα Πρωτάρχωι παρὰ Ἰσιδώρας τῆς Κομ[...........] μετὰ κυρίου τοῦ ἀδελφοῦ Εὐτυχίδου τοῦ Κομ[....] καὶ παρὰ Διδύμης τῆς Ἀπολλωνίου Περσείνης μετὰ κυρίου τοῦ ἀδελφοῦ Ἰσχυρίωνος τοῦ Ἀπολλωνίου. περὶ τῶν διεσταμένων συνχωρεῖ ἡ Διδύμη τροφεύσειν καὶ θηλάσειν ἔξω παρʼ ἑαυτῆι κατὰ πόλιν τῶι ἰδίωι αὐτῆς γάλακτι καθαρῶι καὶ ἀφθόρωι ἐπὶ χρόνον μῆνας δεκαὲξ ἀπὸ Φαρμοῦθι τοῦ ἐνεστῶτος ἑπτακαιδεκάτου ἔτους Καίσαρος ὃ ἐγδέδοται αὐτῇ ἡ Ἰσιδώρα δουλικὸν αὐτῆς παιδίον ἀναίρετον ὑποτίτθιον [......] ὧι ὄνομα [.......] λαμβάνουσα παρʼ αὐτῆς Ἰσιδώρας μισθὸν τοῦ τε γάλακτος καὶ τῆς τροφείας κατὰ μῆνα ἕκαστον ἀργυρίου δραχμὰς δέκα καὶ ἐλαίου κοτύλας δύο, οἷς εὐτακτουμένην αὐτὴν ποιεῖσθαι τήν τε ἑαυτῆς καὶ τοῦ παιδίου ἐπιμέλειαν μὴ φθείρουσαν τὸ γάλα μηδʼ ἀνδροκοιτοῦσαν μηδʼ ἐπικυοῦσαν μηδʼ ἕτερον παραθηλάζουσαν παιδίον, ἅ τε ἐὰν λάβῃ ἢ πιστευθῇ τῶν τούτου ταῦτα σῶα συντηρήσειν καὶ ἀποδώσειν ὅταν ἀπαιτῆται ἢ ἐκτίσειν τὴν ἑκάστου ἀξίαν πλὴν συνφανοῦς ἀπωλείας, ἧς καὶ φανερᾶς γενηθείσης ἀπολελύσθω. αὐτόθεν δʼ ἀπέσχηκεν ἡ Διδύμη παρὰ τῆς Ἰσιδώρας διὰ χειρὸς ἐξ οἴκου δραχμὰς λ καὶ ἔλαιον τῶν πρώτων μηνῶν τριῶν τοῦ τε Φαρμοῦθι καὶ Παχὼν καὶ Παῦνι καὶ μὴ ἐκλίπειν τὴν τροφείαν ἐντὸς τοῦ χρόνου, ἐὰν δέ τι παραβαίνῃ ἐκτίνειν αὐτὴν ἅ τε εἴληφεν τροφεῖα καὶ ἃ ἐὰν προσλάβῃ σὺν ἡμιολίαι καὶ τὰ βλάβη καὶ δαπανήματα, ἐκτίσειν δʼ ἔτι δραχμὰς πεντακοσίας καὶ τὸ ὡρισμένον πρόστιμον, τῆς πράξεως γεινομένης τῇ Ἰσιδώρᾳ ἔκ τε αὐτῆς Διδύμης καὶ ἐκ τῶν ὑπαρχόντων αὐτῆς πάντων καθάπερ ἐκ δίκης, ἀκύρων οὐσῶν καὶ ὧν ἐὰν ἐπενέγκῃ πίστεων πασῶν σκέπης πάσης, ἕκαστα δὲ αὐτῆς ἐπιτελούσης καὶ τὴν Ἰσιδώραν χορηγήσειν αὐτῇ τὰ κατὰ μῆνα τροφεῖα ὡς πρόκειται ἐπὶ τοὺς λοιποὺς μῆνας δεκατρεῖς καὶ μὴ ἀποσπάσειν τὸ παιδίον ἐντὸς τοῦ χρόνου ἢ καὶ αὐτὴν ἐκτίνειν τὸ ἴσον ἐπίτιμον · παραβαλεῖ δὲ ἡ Διδύμη πρὸς τὴν Ἰσιδώραν κατὰ μῆνα ἕκαστον ἀεὶ διὰ ἡμερῶν τεσσάρων ἄγουσα καὶ τὸ παιδίον πρὸς τὸ ἐπιθεωρεῖσθαι ὑπʼ αὐτῆς. ἀξιοῦμεν Ἰσιδώρα συνχωρῶ κατὰ τὰ προγεγραμμένα Εὐτυχίδης ἐπιγέγραμμαι κύριος τῆς ἀδελφῆς καὶ γέγραφα ὑπὲρ αὐτῆς γράμματα μὴ εἰδυίας Διδύμη συνχωρῶ κατὰ τὰ προγεγραμμένα Ἰσχυρίων ἐπιγέγραμμαι τῆς ἀδελφῆς μου κύριος καὶ γέγραφα ὑπὲρ αὐτῆς γράμματα μὴ εἰδυίας Ἰσιδώρας ἔτους ιζ Καίσαρος